Në mbledhjen e radhës të Kryesisë së Kuvendit do të diskutohet konstituimi i ekipit për reformën zgjedhore.

Këtë e ka bërë të ditur shefja e Grupit Parlamentar të Lëvizjes Vetëvëndosje, Mimoza Kusari Lila.

Sipas saj, formula e përbërjes do të jetë sikurse edhe e komisioneve tjera parlamentare.

“Disa herë është bërë përpjekje për reformë zgjedhore por zgjedhjet e kanë pamundësuar. Kosova ka hyrë tashmë në një proces stabil të zgjedhjeve duke u bërë shembull për vendet e rajonit. Përkushtohemi për lehtësim të votuesve jashtë vendit”, deklaroi ajo.

Në këtë komision, Vetëvendosje ka pesë antarë, Partia Demokratike e Kosovës ka dy anëtarë, Lidhja Demokratike e Kosovës ka një, Aleanca për Ardhmërinë e Kosovës ka një, Grupi Multietnik një dhe Lista Serbe një.

Kusari Lila bëri të ditur se seanca e radhës e Kuvendit do të mbahet më 19 maj, të enjten, kur pritet të shqyrtohet edhe Projektligji për policinë ushtarake të Forcës së Sigurisë së Kosovës./arbresh.info/